إيه اللي هيحصل في الأيام الجاية في تدفقات الدولار.. وايه الأخبار السارة في الفترة الجاية.. وازاي هنشوف تحسن كبير في المؤشرات الاقتصادية والمالية وتأثيرها على أسعار الصرف.
فيه اكتر من مؤشر في الفترة الأخيرة بيقول إن الوضع المالي والتجاري والاقتصادي في مصر ليشهد انتعاشة كبيرة منها القفزة الكبيرة في الاحتياطي النقدي الأجنبي واللي كسر حاجز ال 48 مليار دولار ومتوقع يوصل بين 59 و50 مليار دولار بنهاية السنة الحالية وزيادة الاحتياطي معناها أن البلد فيها دولارات كتير لدرجة تقدر تلبي الطلب المحلي من العملة الأمريكية وفي نفس تغطية الاحتياجات الاستيرادية للبلد من السلع الاستراتيجية وكمان سداد أقساط الديون الخارجية ومعناها الأهم إنه خلاص مبقاش عندنا أزمة عملة خانقة.
وزيادة الاحتياطي مؤشر مهم على زيادة إيرادات الدولة من النقد الأجنبي ودا معلن بالارقام الجاية من القطاعات اللي بتجيب دولار زي السياحة والاستثمار والتصدير وتحويلات المصريين بالخارج..
طيب ايه الجديد في ملف التدفقات الدولارية ؟
الجديد اللي حصل وبيحصل في جنوب البحر الاحمر والاتفاق اللي أعلن عنه الرئيس الأمريكي ترامب بالاتفاق مع الحوثيين على وقف استهداف السفن وطرق الملاحة اللي رايحة قناة السويس ودا معناه أن مصر هتسترد اكتر من 7 مليار دولار خسرتها من الأزمة في الملاحة نتيجة هجمات الحوثي وواضح كده أنه هيكون في هدوء في حركة الملاحة وظل معناه أن شركات الشحن البحري العالمية هترجع تاني توجه سفنها للعبور من قناة السويس الطريق الاقصر في العالم ومعناه عودة حركة نقل البضائع والتجارة الدولية المارة في البحر الاحمر لطبيعتها وكمان متوقع تزيد بشكل قياسي في الفترة الجاية.
عودة الملاحة لقتاة السويس بكامل طاقتها مش معناه تدفقات دولارية اكتر لكن جاي معاها انتعاشة اقتصادية في المواني المصرية واللوجستيات وزيادة جديدة في حركة التجارة والاستثمار ودا هيزود قيمة مضافة للاقتصاد المصري بعد تحول مصر لسوق عالمي للاستثمارات الخارجية وكمان قناة السويس دخلت خدمات جديدة لخدمة السفن وعليها رسوم إضافية زي خدمات تموين السفن بالوقود العادي أو الهيدروجين الأخضر.. وعشان كده الفريق أسامة ربيع رئيس هيئة قناة السويس اتواصل في الساعات الأخيرة مع كبرى شركات الشحن العالمية لمناقشة عودتها لقناة السويس والمفاوضات مبشرة لأن من مصلحة الشركات دي تعبر من قناة السويس عشان تقلل النفقات بشكل كبير وتقليل خسائرها من عبورها من خطوط ملاحية طويلة جدا زي رأس الرجاء الصالح.
طبعاً اي زيادة في إيرادات القناة معناها زيادة المعروض من الدولار في سوق الصرف وبالتالي هبوط سعر العملة الأمريكية ودا كمان بالتزامن مع زيادة التدفقات الدولارية التانية من القطاعات اللي قلنا عليها بجانب استقبال مصر لحزمة تمويلات جديدة متوقعة من الاتحاد الأوروبي ومن صندوق النقد ومصادر التمويل الدولية التانية ودا كله بينعكس على المؤشرات الاقتصادية في الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
