يا ترى هي خطة الحكومة لإعادة تشغيل المصانع المتعثرة أو المتوقفة وصلت لفين، هل في إجراءات جديدة عشان يتوفق أوضاع المصانع دي وترجع من تاني لخريطة الإنتاج ولا في مصانع منها هتتصفى، وإيه آخر إجراءات وزارة الصناعة في الملف ده؟
في الحقيقة، من فترة الحكومة وتحديدا وزارة الصناعة عملت خطة جادة لإنقاذ المصانع المتعثرة، واللي بدأت بعمل دراسات وتحليلات للأسباب اللي أدت لتوقفها، سواء كانت إدارية أو فنية أو تمويلية، عشان تقدر تلقي حلول جذرية تقدر ترجعها لدورة الإنتاج من جديد.
عشان كده، الفريق مهندس كامل الوزير، نائب رئيس مجلس الوزراء للتنمية الصناعية، ووزير الصناعة والنقل، نفذ مجموعة من المبادرات اللي بتهدف إلى إعادة هيكلة ودعم المصانع المتعثرة والمتوقفة، وده حصل في ظل التحديات الاقتصادية الحالية، ولكن نقدر نقول إن إعادة تشغيل المصانع المتوقفة بتعتبر خطوة ضرورية لتعزيز النمو الاقتصادي وخلق فرص عمل للشباب.
وحاليا، بيتم إزالة كل المعوقات اللي بتمنع إعادة تشغيل المصانع المتعثرة، زي الروتين في الإجراءات أو الديون أو نقص المواد الخام وغيرها من المعوقات.
ولغة الأرقام وفقًا للبيانات الحكومية، بتقول إن عدد المصانع المتعثرة وصل ل 13 ألف مصنع، ووجه الفريق كامل الوزير وزير الصناعة باتخاذ إجراءات عاجلة لحل جميع هذه المشكلات وإعادة التشغيل.
كمان، الوزير شدد على ضرورة إعادة تشغيل هذه المصانع لتوفير المزيد من فرص العمل من خلال حل التحديات اللي بتواجه إعادة التشغيل، خاصة المتعلقة بتوفير تمويلات ميسرة مع التأكد من جدوى المشروع قبل إعادة تمويل تشغيل المصنع.
ودلوقتي فيه توجيه من الرئيس عبد الفتاح السيسي بعدم غلق المصانع، وضرورة التوسع فيها رأسيًا وأفقيًا، وده كان سبب كافي لرفع آلاف المصانع المتعثرة من القوائم البنكية السوداء، لكن سوء الإدارة وغياب الكفاءات وقلة العمالة المدربة بتعتبر من أهم الأسباب اللي بتقف وراء ظاهرة المصانع المتعثرة، عشان كده لازم يكون في شراكة بين القطاعين العام والخاص لتسهيل مهمة الإنقاذ.
ومن هنا، نقدر نقول إن إعادة تشغيل المصانع المعطلة وحل كل مشكلات المصانع المتعثرة، بيتم وفق إجراءات سريعة ودقيقة تتسم بالحوكمة، بداية من الاهتمام بتدريب وتأهيل القوي البشرية والعمالة الفنية للارتقاء بمستواها وحرفيتها، عشان ده ينعكس علي جودة الصناعة وتصديرها للخارج لجلب العملة الصعبة.
كمان، بيتم التصديق الفوري لإعادة تشغيل ومساعدة المصانع المتعثرة على إمتداد النشاط وزيادة مساحته، ودعمها بكل متطلباتها، عشات تقدر تدعم الصناعة المصرية وتزود الإنتاجية، لأن ده بينعكس بصورة مباشرة على التصدير ومن ثم زيادة الحصيلة الدولارية.
والمصانع دي مستقبلا هتقدر تدعم الجنيه قدام العملات الاخرى، لأن حل أزمة الاقتصاد بتبدأ من زيادة الإنتاج وتحقيق قيمة مضافة وزيادة التصدير والحد من الاستيراد للصناعات اللي بيتم إنتاجها في مصر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
