الأيام اللي جاية الاقتصاد المصري هيكون افضل، وهيكون في تحسن اقتصادي كبير علي كل المستويات الكلام ده قاله صندوق النقد الدولي عن الاقتصاد المصري .. ياتري اية سر الكلام ده.. واية توقعات صندوق النقد الدولي عن الاقتصاد المصري.
من فترات طويلة ومصر بتتعاون مع صندوق النقد الدولي ومتبنيين برنامج قومي لاصلاح الاقتصاد القومي، والبرنامج ده هدف تحويل الاقتصاد المصري لقطاع مرن قادر علي التعامل مع كافة الظروف، وميتأثر باي تغيرات أو توترات جيوسياسية أو اقتصادية أو اي متغيرات في العالم.
البرنامج الطموح اللي مصر بتنفذه مع صندوق النقد الدولي هدفه زيادة ايرادات مصادر الدخل الدولارية للدولة المصرية، وتحويل القطاعات اللي بتتحقق خسائر لتحقيق ارباح في الناتج القومي وده اللي مصر بتحاول تحققه من خلال برنامج الطروحات الحكومية واللي الحكومة مواصلة خطط تنفيذه وكل فترة بتعلن عن عدد من الشركات اللي بيتم طرحها في البورصة قدام القطاع الخاص.
طيب اية تفاصيل البرنامج الاقتصادي اللي مصر بتنفذه مع صندوق النقد الدولي؟.
برنامج الاصلاح الاقتصادي اللي مصر بتطبيقه حاليا مع صندوق النقد الدولي كان فيه مشكلة كبيرة جدا بتهدد استمراره وهيا وجود سعرين للصرف في مصر والمشكلة دي اللي كانت مصر بتعاني منها علي مدار شهور طويلة فاتت ولحد مارس 2024 لما الحكومة أخذت قرار تاريخي بتحرير سعر الصرف في مصر بشكل مرن والقرار ده اللي قضي علي وجود السوق السودا في التجارة بالعملة وخلي كل العملات الأجنبية اللي موجودة في السوق المصري ترجع لقنواتها الشرعية في البنوك الوطنية خصوصا ان الشارع المصري كان مليان تجارة بتم خارج البنوك الوطنية من خلال السوق السودا واغلبها كان مصدره الاساسي هما المصريين العاملين بالخارج، واللي مع تحرير سعر الصرف بشكل مرن كل الفلوس دي كلها رجعت للبنوك الوطنية وحاليا تحويلات المصريين العاملين بالخارج عاملة نتائج تاريخية لما يقرب من 30 مليار دولار .
طيب اية المفاجاة اللي اعلن عنها صندوق النقد الدولي لمصر؟.
صندوق النقد الدولي اعلن عن مفاجاة حلوة للمصريين عن مستقبل الاقتصاد المصري في ظل البرنامج الطموح اللي الدولة بتنفذه دولوقتي مع الصندوق، والصندوق توقع ارتفاع احتياطي مصر من النقد الأجنبي بنسبة 16% خلال الـ5 سنين اللي جايين علشان يوصل لـ 73 مليار دولار مقارنة بـ 44.9 مليار دولار في العام المالي الحالي.
التقرير اللي نشره صندوق النقد الدولي عن توقعاته للاقتصاد المصري توقع كمان ارتفاع الاحتياطي الأجنبي لمصر إلى 49 مليار دولار في العام المالي اللي جاي بزيادة 5 مليار دولار، ده غير زيادة صادرات مصر من السلع والخدمات إلى 103.5 مليار دولار في 2030، والواردات هتنخفض لـ 142.6 مليار دولار في نفس العام.
الصندوق توقع كمان أن حجم الاقتصاد المصري هيوصل لـ 586.9 مليار دولار في 2030، علشان يحافظ على مكانته كثالث أكبر اقتصاد عربي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
