يا ترى ايه سر زيادة التدفقات الدولارية على مصر الفترة الأخيرة؟ وازاى كل مصادر الدولار تقريبا حصل فيها زيادات كبيرة طبعا ما عدا قناة السويس؟ وهل الانفراجة دي فى عوايد الدولار ممكن يكون ليها مردود على الأسعار فى مصر؟
من ايام البنك المركزي المصري أصدر تقرير عن ميزان المدفوعات للنص الأول من السنة المالية 2024/2025 .. يعني من يوليو لديسمبر 2024 .. التقرير ده بيقول إن التدفقات الدولارية زادت بشكل كبير .. وده خلّى ميزان المدفوعات يحقق فائض 9.7 مليار دولار .. قارن ده بـ882 مليون دولار بس في نفس الفترة السنة اللي فاتت .. يعني زيادة خرافية.
طب إزاي ده حصل؟ .. خلينا نكتشف المصادر اللي جابت الدولارات دي واحدة واحدة.
أول حاجة .. تحويلات المصريين في الخارج قفزت بنسبة 81% .. يعني وصلت 17 مليار دولار في 6 شهور بس .. ده رقم ضخم .. والسبب إن السوق الموازية للدولار اختفت تقريبا بعد تحرير سعر الصرف في مارس 2024 .. الناس بقت بتحول فلوسها من البنوك الرسمية .. تاني حاجة .. السياحة إيراداتها زادت بنسبة 12% ووصلت 8.7 مليار دولار .. ده بفضل زيادة عدد السياح في شرم الشيخ والغردقة .. تالت حاجة .. الاستثمارات الأجنبية المباشرة .. زادت بنسبة 9% ووصلت 6 مليار دولار .. وده بسبب صفقات زي رأس الحكمة ومشاريع الطاقة .. وأخيرا الصادرات غير النفطية زادت بنسبة 19% ووصلت 16 مليار دولار .. بفضل قطاعات زي الأسلاك والكابلات والملابس والفواكه .. يعني مصر بقت بتصدر أكتر وبتجيب دولارات أكتر.
طب وايه تاثير زيادة التدفقات الدولارية؟
الزيادة في الدولارات ساعدت البنك المركزي يزود احتياطي النقد الأجنبي .. في أبريل 2025 وصل 48.14 مليار دولار .. ده معناه إن البنوك بقت عندها دولارات تفتح بيها اعتمادات للاستيراد .. يعني السلع الأساسية زي القمح والزيت والأدوية بقت متوفرة أكتر .. وده قلل الضغط على الأسعار .. التضخم فعلا بدأ يهدى .. في أبريل 2024 كان التضخم 32.7% .. وفي أبريل 2025 نزل لـ30.6% .. مش كتير لكن بداية .. بس لسه فيه تحديات .. زي إن أسعار الوقود زادت 3 مرات في 2024 .. وده رفع تكلفة المواصلات والسلع شوية.
كمان مصر عندها التزامات خارجية كبيرة .. البنك المركزي قال إن الديون المستحقة في 2025 حوالي 22.4 مليار دولار .. لكن الزيادة في الدولارات ساعدت مصر تسدد التزاماتها من غير أزمات .. زي فوائد وأقساط ديون .. وكمان مصر بتستعد تاخد شريحة جديدة من قرض صندوق النقد الدولي بـ1.3 مليار دولار بعد نهاية المراجعة الخامسة لبرنامج الاصلاح.. ده غير إن صفقة رأس الحكمة جابت 35 مليار دولار .. ودي كانت زي الإنقاذ في وقت صعب .. يعني مصر دلوقتي عندها سيولة دولارية تدير بيها الديون وتحافظ على استقرار الجنيه.
مصر فعلا بتشهد انفراجة في أزمة الدولار .. تحويلات المصريين .. السياحة .. الاستثمارات .. الصادرات .. كل ده بيقول إن الاقتصاد بدأ يستعد قوته .. لكن لسه فيه شغل كتير .. لازم الصادرات تزيد أكتر .. والسياحة ترجع لأيامها الذهبية .. ولو التوترات في المنطقة هديت هتبقى الصورة أحسن.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
