إيه اللي يخلي تدفقات الاستثمار الأجنبي المباشر في مصر تقفز لـ6 مليار دولار في 6 شهور بس؟ .. وليه القطاع البترولي والعقارات بقوا نجوم الاستثمار فجأة؟ .. هو الاقتصاد المصري فعلاً بقى جاذب للاستثمارات الأجنبية ولا فيه حاجة تانية؟ .. لو عايز تفهم يعني إيه استثمار أجنبي مباشر وإزاي الـ6 مليار دولار دول ممكن يعملوا انفراجة مهمة فى أزمة نقص الدولار.
الأول لازم نفهم إيه هو الاستثمار الأجنبي المباشر أصلاً؟
الاستثمار الأجنبي المباشر ببساطة .. هو الفلوس اللي بتيجي من مستثمرين أجانب عشان يعملوا مشاريع كبيرة في مصر .. زي إن شركة أجنبية تبني مصنع أو تشتري حصة في شركة مصرية أو حتى تستثمر في مشروع بترول أو عقارات .. المميز في الاستثمار ده إنه مش فلوس بتيجي وتطلع بسرعة زي البورصة .. لا .. ده فلوس بتستقر في البلد وبتخلّق فرص شغل وبتحرّك الاقتصاد .. يعني زي ما تكون بتبني عمارة قوية مش بس بترسم صورة على ورق.
إيه اللي حصل في النص الأول من 2024/2025؟.
تقرير البنك المركزي بيقول إن صافي تدفقات الاستثمار الأجنبي المباشر في مصر وصل لـ6 مليار دولار في النص الأول من السنة المالية 2024/2025 .. دي زيادة عن 5.5 مليار دولار في نفس الفترة السنة اللي فاتت .. يعني فيه تحسن ملحوظ.
بس إيه اللي خلّى الرقم ده يرتفع؟
أول حاجة .. القطاع البترولي كان نجم الاستثمار الأجنبي.. التدفقات الواردة للبترول وصلت لـ2.9 مليار دولار، مقابل 2.6 مليار السنة اللي فاتت .. والأحلى إن التحويلات للخارج (يعني الفلوس اللي بتطلع عشان تسدد تكاليف قديمة) نقصت من 3 مليار لـ2.7 مليار دولار .. يعني صافي التدفق للداخل بقى إيجابي بـ196.9 مليون دولار بعد ما كان سلبي السنة اللي فاتت.
تاني حاجة .. القطاعات غير البترولية كمان عملت شغل عالي .. وصلت تدفقاتها لـ5.8 مليار دولار ..مخصصة لتأسيس شركات جديدة أو زيادة رأس مال شركات قايمة .. ده غير إن العقارات كانتفى القمة برضوا .. الأجانب اشتروا عقارات بـ732 مليون دولار، أعلى من 536 مليون السنة اللي فاتت.. يعني المستثمرين بقوا بيثقوا أكتر في السوق المصري.
وإيه تاني اللي ساعد على زيادة التدفقات الدولارية من الاستثمار الأجنبي ؟
الزيادة دي ماجاتش لوحدها .. فيه حاجات كتير ساعدت .. أولاً صفقة رأس الحكمة اللي لسه بتجيب فلوس كبيرة .. تانياً تحرير سعر الصرف في مارس 2024 خلّى السوق أكتر استقرار .. كمان تحويلات المصريين في الخارج زادت بشكل كبير، وده بيدّي ثقة للمستثمرين .. حتى البنوك نفسها ساهمت .. صافي تدفقات الأصول الأجنبية للبنوك وصلت لـ7.4 مليار دولار، وده رقم قوي جداً مقارنة بالسنة اللي فاتت.
بس زي ما فيه ايسجابيات فيه برضوا سلبيات وتحديات.. مثلاً استثمارات البورصة (الأوراق المالية) شافت تدفق للخارج بـ3.7 مليار دولار .. يعني المستثمرين الأجانب باعوا أسهم أكتر ما اشتروا .. لكن الاستثمار المباشر عوّض الخسارة دي بقوة.
طب .. الـ6 مليار دولار دول هيغيّروا إيه في حياتنا؟
الاستثمار الأجنبي المباشر بيخلّق فرص شغل .. يعني لو شركة أجنبية بنت مصنع هتوظّف مصريين .. تانياً الاستثمار الأجنبي بيزوّد إنتاجية الاقتصاد، لأن الفلوس دي بتتحط في مشاريع حقيقية زي مصانع أو مشروعات طاقة .. كمان الاستثمار الجنبي بيزيد من قوة الجنيه لأن زيادة الدولارات في البلد بتقلل الضغط على العملة .. وأخيراً لما المستثمرين الأجانب يشوفوا إن مصر بتجذب فلوس كتير هيبقوا واثقين يجيبوا فلوسهم هما كمان وده بيحرّك عجلة الاقتصاد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
