ليه الامارات بتستثمر كل المليارات دي في مصر والإمارات هتكسب ايه من المشروعات دي .. وليه الامارات مركزة في قطاعات الطاقة والسياحة.. والمواطن المصري هيستفاد ايه من كل الأرقام والمليارات اللي بيسمع عنها.
بلغة الأرقام الامارات العربيه المتحده اكتر دولة في العالم استثمرت وبتستثمر حاليا بداية من مشروع رأس الحكمة العملاق ولغاية مشروعات الطاقة اللي بتنفذها حاليا في مصر.. وبلغة الأرقام هنلاقي إن الإمارات في الوقت الحالي بتضخ استثمارات بحوالي 56 مليار دولار منها 35 مليار في مشروع رأس الحكمة و21 مليار دولار في مشروعات الطاقة..
الشركات والصناديق الإماراتية مركزة اغلب استثماراتها في قطاعات السياحة والترفيه والتسوق والعقار الفاخر من خلال مشروع رأس الحكمة بالساحل الشمالي وفي قطاع الطاقة من خلال 7 مشروعات عملاقة هتحول مصر لوحش في قطاع الطاقة بالمنطقة كلها وكفاية نعرف إن مشروعات الطاقة الإماراتية بأنواعها في مصر هتضيف اكتر من تلت حجم الطاقة اللي موجوده في مصر دلوقتي يعني بنتكلم عن نهضة عظيمة في القطاع الاستراتيجي دا واللي بيفتح الطريق لصفقات تصدير ضخمة للكهرباء المصرية الي أوروبا ودول الخليج وغيرها من الدول مع تحقيق فائض ضخم من الطاقة الكهربائية النظيفة اللي مش بتعتمد على السولار ولا الديزل أو المازوت.
الأرقام بتقول كمان إن مشروعات الطاقة الإماراتية في مصر واللي بتنفيذها شركة مصدر العملاقة هتضيف قدرة إجمالية تبلغ 21 جيجاوات ودا بيوازي زي ما قلنا اكتر من تلت إجمالي إنتاج الكهرباء في مصر عبر تاريخها باستثمارات تتخطى 21 مليار دولار كمان المشروعات الجديدة هتحط مصر في موقع الريادة الإقليمية وهتعزز قدرتها على تصدير الكهرباء النظيفة عبر شبكات الربط إلى الدول المجاورة وأوروبا.
الشركات الإماراتية اختارت أهم قطاعات اقتصاديه في مصر عشان تضخ فيها مليارات الدولارات عشان القطاعات دي سواء السياحة أو الطاقة من اكتر القطاعات المربحة والواعدة في مصر مع النمو المتزايد للسياح الأجانب والعرب للسوق المصري أو الطاقة اللي مصر هتستغل موقعها الجغرافي المتميز والقريب من الأسواق الأوروبية والإفريقية والعربية لتصدير الكهرباء لأسواق متعطشة للطاقة.
طيب إيه مشروعات الطاقة اللي بتنفذها شركة مصدر الإماراتية في مصر ؟
شركة مصدر الإماراتية سبق وأعلنت عن 7 مشروعات كبرى في مصر من الطاقة الشمسية والرياح بقدرة إجمالية تبلغ 21 جيجاوات ودا بيعتبر إحدى أكبر الاستثمارات في قطاع الطاقة النظيفة بالمنطقة كلها وبتشارك مصدر تنفيذ المشروعات مع مجموعة تحالفات مع شركات مصرية زي إنفينيتي باور وحسن علام للمرافق و بالتعاون مع الجهات الحكومية المصرية المعنية.
واول المشروعات دي هو مزرعة رياح غرب سوهاج – 10 جيجاوات وهو أكبر مشروع من نوعه في مصر والشرق الأوسط والتاني من نوعه على مستوى العالم و استثمارات باكتر من 10 مليار دولار أمريكي وهيوفر 23 ألف فرصة عمل مباشرة وغير مباشرة خلال مرحلتي الإنشاء والتشغيل، كما يمثل ركيزة أساسية لتحقيق هدف مصر الاستراتيجي برفع مساهمة الطاقة المتجددة إلى 42% من مزيج الطاقة، ويوفر ما يقدر بـ5 مليار دولار سنويا من تكاليف الغاز الطبيعي.
تاني مشروع هو محطة ناصر الشمسية العائمة – 5 جيجاوات وبيعتبر أكبر محطة طاقة شمسية عائمة في العالم على سطح بحيرة ناصر بمحافظة أسوان.. وتالت مشروع هو محطة نجع حمادي الشمسية بقدرة 2.8 جيجاوات .. والمشروع الرابع هو محطة أسوان الشمسية بقدرة 1 جيجاوات وباستثمارات 900 مليون دولار وهينفذ بنظام البناء والتملك والتشغيل (BOO)، بحيث تباع الكهرباء المنتجة للشركة المصرية لنقل الكهرباء عبر اتفاق طويل الأجل.
المشروع الخامس لشركة مصدر الإماراتية هو محطة الواحات الشمسية – 0.9 جيجاوات وهيضيف 900 ميجاوات للشبكة المصرية .. أما المشروع السادس فهو محطة بنبان الشمسية وبقدرة 300 ميجاوات وهو توسع لمجمع بنبان الشمسي العملاق في أسوان.. والمشروع السابع والاخير هو مزرعة رياح خليج السويس وبقدرة 200 ميجاوات في منطقة رأس غارب بخليج السويس.
طبعا اي استثمارات جديدة في السوق المصري بتصب بشكل مباشر لصالح المواطن المصري لأنها بتنعش الاقتصاد المصري الكلي وبتساهم في استقرار اسعار صرف الدولار وسعره ينزل بجانب توفير موارد دولارية جديدة من تصدير الطاقة وجذب مزيد من السياح وتوفير آلاف من فرص العمل وتقليل البطالة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
