هو إيه اللي بيحصل في المنطقة الاقتصادية لقناه السويس.. وايه حكاية ال90 مليار دولار اللي جايين وازاي المنطقة هتتحول لمنجم دولارات وثروة للمصريين.
المنطقة الاقتصادية لقناة السويس واحدة من أهم المناطق الصناعية والاقتصادية والتجارية اللي اتعملت في مصر الفترة الأخيرة وكان الهدف منها هو استغلال موقعها الجغرافي الفريد بالقرب من قناة السويس أهم ممر تجاري في العالم وقربها من خطوط التجارة والتصدير الدولية وقربها كمان من شبكة الموانئ المصرية الضخمة وبخلاف قربها من الأسواق العالمية المهمة ودا خلاها المكان المثالي لاي شركة عالمية عاوزة توفر في تكاليف التصنيع والنقل والأيدي العاملة وعشان كده بردو حصل سباق عالمي من الشركات والدول لإقامة مشروعات ومدن صناعية كاملة في المنطقة لاستغلال إمكانياتها اللي قلنا عليها وشفنا الصين عملت مدينة صناعية في المنطقة وكمان الروس عملوا مدينة مشابهة غير الشركات العالمية اللي نقلت جزء من نشاطها للمنطقة.
حسب الأرقام المعلنة اقتصادية قناة السويس استقبلت اكتر من 8 مليار دولار رغم حداثة إنشاءها ودي مش المفاجأة لكن المفاجأة الحقيقة هي حجم الاستثمارات المنتظرة اللي هتدخل المنطقة الاقتصادية وخاصة مشروعات الطاقة النظيفة والهيدروجين الاخضر واللي قدرتها وكالة الشرق بلومبرج حسب مصادر رسمية مصرية بحوالي 90 مليار دولار.. ايوا زي ما حضرتك سمعت كده الرقم 90 مليار دولار ودا قد قرص صندوق النقد الدولي ب11 مرة تقريبا.
وحسب تقرير الوكالة المنطقة الاقتصادية لقناة السويس بتترقب إجمالي استثمارات بأكتر من 90 مليار دولار في صناعة الهيدروجين الأخضر ودا تصريح على لسان نائب رئيس المنطقة محمد عبدالجواد .. وقال المسؤول أن الاستثمارات المرتقبة جاية ضمن 11 اتفاقية إطارية وُقِّعت بالشراكة بين المنطقة الاقتصادية والصندوق السيادي ووزارة الكهرباء وشركاتها التابعة مع مستثمرين وتحالفات استثمارية عربية وعالمية.
الهيدروجين الأخضر بيعتبر هو وقود المستقبل ومش كل دول العالم تقدر تصنعه لانه بيتطلب امكانيات معينة كلها موجودة عند مصر سواء طاقة الرياح والطاقة الشمسية واللي يستخدم في تقسيم ذرات الماء وتصنيع الهيدروجين الاخضر واللي بيعتبر طاقة نظيفة لا تعتمد على الوقود الاحفوري التقليدي زي المواد البترولية..
ولو فاكرين مصر وقعت اتفاقيات ضخمة لتصنيع الهيدروجين الاخضر على هامش قمة المناخ اللي استضافتها مصر وباجمالي استثمارات اجنبية مباشرة في مشروعات الهيدروجين الأخضر هتوصل ل 81.6 مليار دولار بحلول 2035 ودا مع خطة مصرية للتوسع في مجال الطاقة النظيفة وتوفير مليارات الدولارات اللي بندفعها في استيراد الوقود سنويا وبتهدف الخطة إلى دمج الطاقة النظيفة في استراتيجية الطاقة 2035.
طيب ليه مصر متحمسة لإنتاج الهيدروجين الاخضر وسر اهتمام الشركات العالمية للاستثمار في النوع دا من الطاقة ؟
دا لسبب مهم جدا جدا وهو قدرة مصر على إنتاج الهيدروجين الأخضر بأقل تكلفة في العالم ودي ميزة أساسية وراء تحمس الشركات العالمية لتصنيع النوع دا من الطاقة.. ومن المقرر تنخفض تكلفة الإنتاج لتصل إلى 1.7 دولار/كيلو جرام في سنة 2050 مقارنة بـ2.7 دولار/كيلو جرام عام 2025، ومن المتوقع تساهم الاستراتيجية بتخفيض واردات مصر من المواد البترولية، وتقليل انبعاثات الكربون.
مصر مش هتستفاد بس من تصنيع الهيدروجين الاخضر لكن في استفادة من نوع تاني وهو توطين الصناعات المغذية لصناعة الهيدروجين الأخضر زي صمامات المياه اللي بتحتاجها محطات التحلية والمحللات الكهربائية ودا بعد ما نجحت المنطقة بالفعل بجذب استثمارات مرتبطة بتوطين صناعة الألواح الشمسية.
وحسب الأرقام الرسمية تم ضخ استثمارات جديدة بحوالي 3 مليار دولار بالمنطقة الاقتصادية لقناة السويس في مشروعات البنية التحتية والخدمات والمرافق إضافة إلى أكتر من 3 مليار دولار جرى استثمارها بالفعل ودا خلى المنطقة الاقتصادية لقناه السويس تجذب اكتر من 272 مشروع باستثمارات تجاوزت 8 مليار دولار في خلال سنتين فقط .. وفي الشهور الأخيرة استقطبت المنطقة مجموعة مشروعات تعزز مكانتها كمركز صناعي ولوجستي في عدة مجالات زي مشروع إنشاء مصنع لإطارات السيارات باستثمارات مليار يورو، وغيرها من المشروعات اللوجيستية والصناعية والخدماتية.
كل الأرقام القياسية اللي قلنا عليها هتحول المنطقة الاقتصادية لقناه السويس إلى سنغافورة مصرية وكنز بالمليارات هيعود بالنفع المباشر على المواطنين وتحسين مستوى المعيشة وزيادة فرص العمل واكتساب مهارات جديدة في قطاعات حديثة وحيوية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
