يا ترى إيه اللي بيحصل في سوق صرف العملات الأجنبية فى مصر؟ وإزاي الجنيه المصري بيتصدر الأخبار وصندوق النقد الدولي يطلع بتوقعات بتقول إن الجنيه أقوى من اللي كنا متخيلينه؟ زليه الدولار سعره بيتراجع مؤخرًا؟ وإيه اللي بيدّي العملة المصرية القوة دي؟
من ساعات .. صندوق النقد الدولي طلّع تقرير هيقلب الموازين .. التقرير قال ان الجنيه المصري مش بس مستقر .. ده كمان أقوى من توقعاتهم.. التوقعات الجديدة بتقول إن متوسط سعر الدولار في السنة المالية الحالية هيبقى حوالي 49.6 جنيه .. أقل من اللي كانوا متوقعينه قبل كده عند 50.6 جنيه .. وفي السنة اللي جاية 2025-2026 .. الدولار ممكن يوصل 52.26 جنيه بدل 54.89 جنيه زي ما كان متوقع .. وحتى في 2026-2027 .. السعر هيبقى حوالي 54.1 جنيه بدل 57.2 جنيه .. الأرقام دي بتقول إن الجنيه مش بس بيحافظ على مكانته .. ده كمان بياخد خطوات واثقة لقدام.
طب إيه السر ورا القوة دي؟
خليني أقولك .. الاقتصاد المصري حاليا عامل زي اللاعب اللي بيرجع من الإصابة وبيحقق بطولات .. فيه عوامل كتير بتساعد الجنيه يقف على رجليه ويفرض نفسه في السوق وأول حاجة ان عجز الحساب الجاري بدأ يتراجع.
صندوق النقد بيقول إن عجز الحساب الجاري في مصر هينخفض بشكل كبير بداية من السنة المالية الجاية .. من 20.5 مليار دولار دلوقتي لـ14.24 مليار دولار .. وفي 2026-2027 هيوصل لـ13.7 مليار دولار .. يعني إيه الكلام ده؟ يعني الفرق بين اللي بنصدره واللي بنستورده بيقل .. وده بيخفف الضغط على الجنيه وبيديه فرصة يسترد قوته .. التحسن ده مش جاي من فراغ .. فيه طفرة متوقعة في الصادرات بنسبة نمو 11.6% السنة الجاية .. مقارنة بـ5.7% السنة دي .. يعني مصر بتبيع أكتر للعالم .. وده بيجيب دولارات أكتر للبلد.
وتاني حاجة ساعدت فى استعادة الجنيه لقوته هي الطاقة والاستثمارات الأجنبية.. الوضع بقا افضل بسبب عوامل تانية .. زي إن عجز الميزان التجاري للطاقة بيتراجع .. لأن سعر برميل النفط بينزل .. وبنك الاستثمار "سي آي كابيتال" بيقول إن كل 10 دولار انخفاض في سعر النفط تحت 74 دولار هيوفر على مصر حوالي 2 مليار دولار في الميزان التجاري سنة 2025 .. ده غير إن الاستثمارات الأجنبية بتتدفق على مصر زي السيل .. شركات أجنبية بتضخ فلوس في مشروعات كبيرة .. وده بيجيب سيولة دولارية تقوي احتياطي النقد الأجنبي وتدعم الجنيه .. وما ننساش إن إيرادات قناة السويس بدأت ترجع تدريجيًا بعد ما اتأثرت بسبب التوترات الإقليمية .. كل ده بيخلّي الجنيه يتنفس وياخد المساحة يقوى فيها.
طب ليه الدولار بيتراجع؟
لو بصينا على الدولار .. هنلاقي إن سعره في مصر بدأ يهدى شوية لأسباب كتيرة أهمها ان السيولة الدولارية زادت بفضل صفقات كبيرة زي رأس الحكمة اللي جابت 35 مليار دولار .. ده غير تحويلات المصريين في الخارج اللي رجعت تتزايد .. والسياحة كمان بدأت ترجع لأيامها الذهبية .. كل المصادر دي بتجيب دولارات لمصر .. وطبعًا لما العرض بيزيد .. سعر الدولار بيتراجع .. كمان البنك المركزي المصري بيلعب دور كبير .. من ساعة ما ساب سعر الصرف يتحدد بناءً على العرض والطلب في مارس 2024 .. السوق بقى أكتر استقرارًا .. وتراكم الطلب على الدولار قلّ .. ده خلّى الفجوة بين السوق الرسمي والسوق الموازي تضيق .. والنتيجة؟ الجنيه بقى أقوى والدولار مش قادر يتحكم في السوق زي زمان.
مش بس الصادرات والطاقة .. فيه حاجة تانية مهمة جدًا .. ثقة المستثمرين في الاقتصاد المصري بتتزايد .. وكالة "فيتش" وغيرها من وكالات التصنيف الائتماني بدأوا يدوا تقارير إيجابية عن مصر .. وده بيخلّي المستثمرين الأجانب يبصوا لمصر على إنها فرصة ذهبية .. الاستثمارات الأجنبية المباشرة متوقع تتخطى 10 مليار دولار .. وده بيوفر سيولة كبيرة تدعم الجنيه .. حتى برنامج الطروحات الحكومية بيشجع القطاع الخاص يشارك أكتر .. وده بيخلّي الاقتصاد يتحرك في دايرة إيجابية: استثمارات أكتر .. شغل أكتر .. وجنيه أقوى.
طب .. مصر محتاجة كام عشان تواجه التحديات؟
بنك "سي آي كابيتال" بيقول إن الاحتياجات التمويلية بتتراوح بين 27 و29 مليار دولار .. ومصر بتخطط تسد الرقم ده من خلال 10 مليار دولار أقساط ديون .. و10 مليار تانيين استثمارات أجنبية مباشرة .. و4 مليار دولار من الأسواق العالمية .. لو حسبنا كده .. هيفضل فجوة صغيرة بين 3 و5 مليار دولار .. ودي ممكن تتغطى من صفقات زي بيع أراضي أو مشروعات جديدة .. يعني مصر عندها خطة محكمة عشان توازن الميزانية وتحافظ على استقرار العملة.. الخلاصة: الجنيه بيكتب قصة نجاح جديدة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
