يا ترى امته البنك المركزي المصري هيجتمع تاني لتحديد أسعار الفايدة في الفترة الجاية، والاجتماع الجاي ده هيكون رقم كام في سنة 2025 وإيه هي أهميته، ويا ترى إيه هي توقعات الفايدة اللى ممكن تحسم في الاجتماع ده.
دلوقتي، لجنة السياسة النقدية في البنك المركزي المصري، برئاسة حسن عبد الله، بتستعد للاجتماع التاني لها في سنة 2025، وده بعد ما عقدت أول اجتماع في شهر فبراير اللي فات.
والاجتماع القادم هيقدر يحسم أسعار الفايدة على الإيداع والإقراض، في ثاني اجتماعاتها خلال سنة 2025، واللي مقرر له يوم الخميس الموافق 17 أبريل الحالي.
طب إيه هي توقعات قرار البنك المركزي؟
بص يا سيدي، عدد كبير من شركات الأبحاث وبنوك الاسنثمار والخبراء المصرفيين، أكدوا اتجاه لجنة السياسة النقدية في البنك المركزي المصري، للبدء في تخفيض أسعار الفايدة، بداية من اجتماع أبريل، وهيفضل يخفض لحد نهاية سنة 2025، ومتوقع التخفيض ده يكون بنسبة تتراوح ما بين 4% ل 10% بنهاية السنة.
والتوقعات دي راحت على تخفيض الفايدة بسبب انخفاض معدلات التضخم في مصر أو ارتفاع الأسعار، واللي تراجعت بنسبة 12% بنهاية شهر فبراير اللي فات، وده لأن التضخم مرتبط ارتباط وثيق بسعر الفايدة، لو نزل الفايدة هي كمان تنزل والعكس صحيح.
وكانت لجنة السياسة النقدية في البنك المركزي المصري، عقدت أول اجتماع لها في 2025، يوم 20 فبراير اللي فات، عشان تحسم أسعار الفايدة على الإيداع والإقراض، وقررت بالفعل تثبيت أسعار الفايدة على الايداع والاقراض للمرة الأولى في 2025، وللمرة السابعة على التوالي في اجتماعات اللجنة.
كمان، لجنة السياسة النقدية للبنك المركزي المصري، أعلنت عن الإبقاء على سعري عائد الإيداع والإقراض لليلة واحدة وسعر العملية الرئيسية للبنك المركزي عند 27.25% و28.25% و27.75%، على الترتيب، وبرضو قررت الإبقاء على سعر الائتمان والخصم عند 27.75%.
وبكده، يبقي فاضل 6 اجتماعات للجنة السياسة النقدية في البنك المركزي خلال سنة 2025، واللي هي: الاجتماع الثالث في 22 مايو المقبل، والاجتماع الرابع للبنك المركزي في 10 يوليو 2025، واجتماع خامس في 28 أغسطس، أما الاجتماع السادس فهيكون في 2 أكتوبر، والاجتماع السابع يوم 20 نوفمبر، والأخير أو الثامن في 25 ديسمبر 2025.
وكان البنك المركزي المصري، رفع أسعار الفايدة على مدار عامين كاملين بنسبة 19%، وجت آخر زيادة في مارس 2024 بواقع 600 نقطة أساس دفعة واحدة، عشان كده متوقع صدرو قرارات بتخفيض الفايدة في الاجتماعات الجاية على مدار سنة 2025.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
