يا ترى الدولار الأمريكي هيفضل ملك العملات للأبد ولا فيه حد بيجهز ينافسه؟ وليه الصين بتحلم تحط اليوان مكان الدولار .. مش بس كده .. دب بتحاول كمان تستبدل نظام "سويفت" الأمريكي بنظام صيني جديد اسمه "سيبس" .. هل الصين فعلاً هتقدر تكسر هيمنة الدولار؟ .. وإيه اللي ممكن يحصل لو ده حصل؟ .. وايه تفاصيل النظام الجديد للتحويلات الرقمية باليوان الصيني .. وتأثيره على الدولار .. وإيه الفرق بينه وبين "سويفت" .. وكام دولة اشتركت فيه لحد دلوقتي؟
فى البداية كده ليه الصين عايزة تغير قواعد اللعبة؟
الدولار الأمريكي بيسيطر على الاقتصاد العالمي من عشرات السنين .. حوالي 60% من احتياطي النقد الأجنبي في العالم بالدولار .. و90% من التحويلات البنكية الدولية بتمر من خلاله .. ده معناه إن أمريكا بتحكم السوق المالي العالمي تقريبًا .. بس الصين مش مرتاحة للوضع ده .. ليه؟ .. عشان أي عقوبات اقتصادية أمريكية ممكن تمنع أي دولة من استخدام نظام "سويفت" .. وده بيخلي أي اقتصاد معتمد على الدولار في خطر .. الصين بتحاول تبني نظام بديل يخليها هي اللي ماسكة المقاليد .. وهنا بييجي دور اليوان الرقمي ونظام "سيبس".
اليوان الرقمي أو اللي بيسموه "e-CNY"، هو أول عملة رقمية مركزية في العالم يصدرها بنك مركزي .. الصين بدأت تجربته من 2020 .. وفي 2021 كان فيه أكتر من 261 مليون حامل لليوان الرقمي داخل الصين .. النظام ده بيسمح بتحويلات سريعة جدًا .. وأرخص بكتير من "سويفت" .. يعني بدل ما تستنى 3-5 أيام عشان تحول فلوس من دولة لدولة .. ممكن تخلّص العملية في 7 ثواني بس .. وبتكلفة أقل بنسبة 98% .. مش بس كده .. الصين بتحاول تربط النظام ده بمشروع "الحزام والطريق" .. عشان تخلق شبكة اقتصادية مغلقة تعتمد على اليوان بدل الدولار.
وإيه الفرق بين "سيبس" الصيني ونظام "سويفت"؟
"سويفت" هو نظام عالمي بيستخدمه أكتر من 11 ألف بنك ومؤسسة مالية في 200 دولة .. بيمرر حوالي 50 مليون رسالة مالية يوميًا .. وبيسهل تجارة بقيمة 5 تريليون دولار كل يوم .. بس عيوبه إنه بطيء نسبيًا .. ومكلف .. وأهم حاجة: أمريكا بتتحكم فيه .. لو أمريكا قررت تفرض عقوبات على دولة .. ممكن تقطعها من "سويفت" .. زي ما حصل مع روسيا وإيران.
في المقابل .. نظام "سيبس" الصيني، اللي انطلق في 2015 .. هو نظام دفع دولي بيعمل على تسوية المعاملات باليوان .. بيوفر خدمات المقاصة والتسوية بشكل مباشر .. على عكس "سويفت" اللي بيعتمد على شبكة بنوك وسيطة .. "سيبس" أسرع .. وأرخص .. وبيمرر حوالي 15 ألف رسالة يوميًا .. صحيح الرقم ده صغير قدام "سويفت" .. بس النظام بيتطور بسرعة .. وبيجذب بنوك كبيرة زي "إتش إس بي سي" و"ستاندرد تشارترد" في هونج كونج .. وده بيدل على إن النظام بدأ يكسب ثقة.
طب كام دولة اشتركت في النظام الصيني؟
لحد دلوقتي .. مفيش أرقام دقيقة رسمية عن عدد الدول اللي اشتركت رسميًا في "سيبس" .. بس فيه تقارير بتقول إن الصين ربطت النظام ده مع 10 دول آسيوية و6 دول في الشرق الأوسط .. وده بيغطي حوالي 38% من حجم التجارة الدولية .. دول زي باكستان وتايلاند والإمارات بدأوا يستخدموا اليوان في معاملاتهم التجارية .. ومصر كمان وقّعت اتفاقيات مع الصين في 2024 عشان تستخدم العملات المحلية في التجارة البينية .. يعني الجنيه المصري واليوان بدل الدولار .. ده غير إن الصين بتحاول من خلال مبادرة "الحزام والطريق" تجذب دول أفريقيا وآسيا للنظام ده.
وايه تأثير ده على هيمنة الدولار.. وهل هل اليوان الرقمي و"سيبس" فعلاً هيهزوا عرش الدولار؟
الإجابة مش بالسهولة دي .. الدولار لسه قوي جدًا .. بيمثل نص المعاملات التجارية العالمية .. وأي تغيير جذري في هيمنته محتاج عقود مش سنين .. بس الصين بتلعب على المدى الطويل .. لو نجحت في إقناع دول أكتر تستخدم اليوان .. ممكن توجّه ضربة قوية للدولار .. خصوصًا لو الدول اللي بتعاني من عقوبات أمريكية زي روسيا وإيران انضمت للنظام الصيني .. زيادة على كده .. اليوان الرقمي بيسهل على الدول اللي ماعندهاش بنوك قوية إنها تتعامل مباشرة بدون ما تحتاج وسطاء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
