ازاي الساحل الشمالي المصري اتحول لمنجم مليارات .. وايه حكاية المشروع السعودي الأكبر في المنطقة بعد رأس الحكمة وايه تفاصيل الصفقة الجديدة.
البنية الأساسية الحديثة اللي اتعملت في عهد الرئيس السيسي والتشريعات اللي اتغيرت والفكر الجديد فتح أبواب الاستثمار على مصراعيه في كل أنحاء مصر واتحولت مصر لأهم سوق واعد في العالم مع تعدد الفرص الاستثمارية والموقع الجغرافي والقرب من الأسواق العالمية وأنياب مصر من المواني واللوجستيات والمحاور العالمية للتجارة وقناة السويس كلها رشحت مصر تكون الاقتصاد السابع عالمياً في 2075 حسب توقعات أكبر المؤسسات المالية الدولية ودا مجاش من فراغ ولا كان نوع من المجاملة لأن الاقتصاد مايعرفش غير لغة الأرقام والمؤشرات والبيانات.
النهاردة هنتكلم عن الساحل الشمالي المصري بس لأنه لوحده تحول لتجربة مصرية فريدة من نوعها في جذب الاستثمارات ومليارات الدولارات من الخليج العربي والصين وغيرها من الدول ودا لأن الساحل الشمالي باختصار اتحول لمنجم دهب دولارات ملهاش نهاية ودا بسبب طبيعة الطقس الفريد من نوعه وصفاء وشفافية المياه فيه وشواطئه الفيروزية والمسطحة ودا حوله لمركز جمال من صنع الطبيعة ولأنه كمان قريب من كل أسواق السياحة والسفر العالمية خاصه في أوروبا والشرق الأوسط والخليج العربي ومتوقع يتحول لعاصمة المتعة والسياحة والضيافة والترفيه وموطن البراندات العالمية من المطاعم والفنادق ودور الأزياء وشركات التسويق وتصدير العقار.
ليه بنتكلم النهاردة عن الساحل الشمالي بالذات؟
عشان ببساطة حضرتك كمية الاستثمارات اللي فيه واللي لسه هتضخ في المنطقة ضخمة جدا وغير مسبوقة ودا بعد صفقة رأس الحكمة الإماراتية واللي بتعتبر أكبر صفقة من نوعها وهتوصل حجم استثماراتها 150 مليار دولار بنهاية المشروع وهتخلق مجتمع عصري وسياحي فريد من نوعه هتجلب مليارات الدولارات للبلد سنويا لأن الحكومة المصرية ليها نسبة في المشروع وفي نفس هتحصل استثمارات تانية من المناطق المحيطة بالمشروع واللي مشروع رأس الحكمة رفع من قيمتها المضافة وخلالها سعر بالبلدي كده..
والجديد في الساحل الشمالي هو الكشف عن مشروع استثماري جديد مشابه لرأس الحكمة الإماراتي والمرة دي مع السعودية ولو فاكرين من كام شهر رئيس الوزراء الدكتور مصطفى مدبولي كان قال إن السعودية هتعمل مشروع في منطقة الساحل الشمالي اهو دلوقتي تم الإعلان رسميا عن المشروع السعودي الجديد واللي حصل باختصار إن الدكتور مصطفى مدبولي عرض فرص استثمارية على وفد ضم عدد كبير من رجال الأعمال السعوديين البارزين، ودا بعد يوم واحد من انعقاد مُلتقى رجال الأعمال المصري السعودي اللي استضافته القاهرة أمس ومن بين المشروعات المهمة كان تطوير واستغلال مناطق واسعة للاستثمار السعودي في الساحل الشمالي الغربي والشرقي كمان وعمل مشروعات سياحية ضخمة تتماشي مع مستقبل المنطقة الواعد في القطاع دا.
حسب المعلومات الأولية فيه حماس كبير من المستثمرين السعوديين للاستثمار في المنطقة واستغلال كل الإمكانيات المتاحة اللي قلنا عليها وكمان تمتعها بالرخصة الذهبية اللي الدولة أعلنت منحها لكل الشركات السعودية في المشروعات الجاية وكمان المعلومات بتقول إن المشروع السعودي هيكون ضخم جدا وهيتم الاعلان عن تفاصيله قريب جدا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
